Bachelor në Mësuesi për Arsimin Parashkollor

Departamenti Pedagogji-Psikologji ofron program studimi në “Mësuesi për arsimin parashkollor”. Programi ofrohet me kohë të plotë dhe me prani fizike, me përjashtim të një situate të rënduar kombëtare Covid-19, që detyron institucionin të marrë vendimin për një formë alternative të ndjekjes.

Programi përgatit mësues dhe specialistë për arsimin parashkollor, me teoritë dhe praktikat e edukimit të fëmijërisë së hershme, mësimit dhe veprimtarive që zhvillojnë dijet, konceptet, kompetencat, vlerat dhe qëndrimet e kërkuara për profesionin. Programi ofrohet në gjuhën shqipe. Kohëzgjatja zyrtare e programit të studimit është 3 vite akademike, në fund të të cilave përftohen 180 kredite.

Objektivat dhe veprimtaritë formuese të programit të studimit

Programi i studimit “Bachelor në Mësuesi për Arsimin Parashkollor” është program i ciklit të parë të studimeve universitare. Ky program organizohet me 180 kredite ECTS, ofrohet me kohë të plotë, me kohëzgjatje akademike 3-vjeçare. Studimet në këtë program ofrohen në gjuhën shqipe. Ky program studimi i takon nivelit të 6-të të studimeve sipas Kornizës Shqiptare të Kualifikimeve. Në përfundim të studimeve lëshohet “Diplomë Bachelor në Mësuesi për Arsimin Parashkollor”.

Misioni i programit “Bachelor në Mësuesi për Arsimin Parashkollor” është të pajisë studentët me njohuritë e nevojshme bazë në fushën e arsimit parashkollor dhe t’u zhvillojë atyre kompetencat e nevojshme për t’u përgatitur si mësues të arsimit parashkollor. Programi bazohet në një kornizë konceptuale të teorisë aktuale, perspektivave bashkëkohore dhe gjetjeve të kërkimit shkencor në fushën e arsimit parashkollor. Programi përqendrohet në zhvillimin e njohurive, qëndrimeve, aftësive, në praktikën, reflektimin dhe përvojat në terren, të nevojshme për t'u bërë profesionist kompetent në fushën e arsimit parashkollor. Për realizimin e këtij misioni, programi parashikon thellime në fusha të tilla, si psikologjia e zhvillimit, psikologjia e edukimit, kurrikula, metodologjia e mësimdhënies, metodika speciale, vlerësimi i fëmijës së moshës parashkollore, pedagogjia familjare, gjuhësia, matematika, shkencat shoqërore, shkencat e natyrës, artet, etj.

Mundësia për studime të mëtejshme

Sistemi i njohurive që ofrohet nga ky program dhe aftësitë që fitojnë studentët nëpërmjet tij, u mundësojnë atyre të ndjekin një karrierë profesionale, akademike ose kërkimore, nëpërmjet vazhdimit të studimeve universitare në ciklin e dytë, në programet master profesional ose master i shkencave në fushën e mësuesisë, të shkencave të edukimit ose fusha të përafërta.

Mundësitë e punësimit dhe të kualifikimit profesional

Studenti, i cili zotëron “Diplomë Bachelor në Mësuesi për Arsimin Parashkollor” mund të punësohet si mësues në institucionet e arsimit parashkollor, në qendra të fëmijëve parashkollorë, në institucione dhe organizata që mbulojnë çështje të arsimit parashkollor, në media, në shtëpi botuese, etj.